Auf'm Christkindlmarkt

von Walter Weinzierl

Selbstgedichtet im Dezember 1991:

                                                                       A so a Christkindlmarkt is schee,
                                                                       do mechat i a heier wieda zuawegeh
                                                                       I gfrei mi auf an Glühwein und Mandlstern.
                                                                       A Räuchamandl und a Kripperl sehgat i gern.
                                                                       So eigstimmt nimm i meine Kinder bei da Hand
                                                                       Und spazier sche gmüatli zum Christkindlland.
                                                                                               
                                                                       „Ja wo is‘ denn?“ frogt da Bua ganz zaghaft,
                                                                       vor lauta Leit siegt ma bloß schemenhaft
                                                                       de Standl mit de Sachan de guatn
                                                                       wos de mia ois‘ auf Weihnachtn zuamuatn.
                                                                       „I mecht a wos sehgn“, sogt s’Deandl na drauf
                                                                       I hocks deshoib auf meine Schultern nauf.                 

                                                                       Do tupft mi a Frau vo hintn o
                                                                       „wia stellns eahna des vor, sie guata Mo,
                                                                       moanans, i mecht nix sehgn vo dera Pracht,
                                                                       wia do vorn drin des Christkindl lacht?“
                                                                       Jetzt schiams me auf d’Seitn – nei in an Haufa
                                                                       Plastikteller mit Sauerkraut, des gibt’s do zun Kaufa;
                                                                      
                                                                       Da Dreck liegt neban Papierkorb, weil der is voi,
                                                                       ob des des große Umweltdenka sei soi?
                                                                       „Ja seits es a do?“, frogt mi a Mo
                                                                       Den i weng a Zuckerwatt net dakenna ko;
                                                                       Mei Nachbar is‘, - „gell“, sogt er, „heit is‘ schee“ –
                                                                       Vom Tonbandl rieselt leise da Schnee.

                                                                       A Weihnachtsmann rennt umanand, hot a routs Gwandl o,
                                                                       doch wos siehg i, an seim Strick hengt a Hund dro
                                                                       mit agrat dem gleichn routn Gwand wias Herrle
                                                                       ausschaugn duat a wia a Zuckerbärle
                                                                       Auf’s erste hob i no lauthois glacht
                                                                       Doch drauf hob i mia gedacht,
                                                                       wos werd si do da echte Niklo denka,
                                                                       wanns anam Hund jetzt scho sei Gwandl schenka?    

                                                                       Is denn de ganze Welt varuckt und valebt
                                                                       Oda bins i selber und kenns no net?
                                                                       Do drübn neba da Oidn Apothekn
                                                                       Bin i in PommFritts mit Ketschap einetrettn.
                                                                       Im Vabeigeh schmiert a Bua sein Apfe mit Schoklad
                                                                       Meina Frau an den neia Mantl, ouh des werd fad!

                                                                       Wia soi des bloß wieda außageh?
                                                                       Ja so a Christkindlmarkt is schee!
                                                                       Ja so a Christkindlmarkt is schee,
                                                                       do mecht i so schnell nimma zuawe geh
                                                                       Liabs Christkindl, i entschuidig mi für de andern
                                                                       Wos de ois ostelln in deim Nama.

                                                                       Zwischen de Stand mit de Kochtöpf und Punsch
                                                                       Hob i vo olle Wünsch bloß no oan Wunsch:
                                                                       Loßts me nur ganz schnell naus aus dem Trube
                                                                       Vaganga i nemli Halleluja und Jube!